جوانی میں ہی بال سفید ہونے لگے ہیں؟ وجہ جانیں اور ہیئر کلر خریدتے وقت یہ باتیں یاد رکھیں

سفید بالوں کو عموماً بڑھتی عمر کی نشانی سمجھا جاتا ہے لیکن اگر 20 یا 30 سال کی عمر میں ہی بال سفید ہونے لگیں تو یہ نوجوانوں کے لیے پریشانی کا باعث بن سکتا ہے۔ ایسی صورت میں اکثر لوگ سفید بال چھپانے کے لیے ہیئر کلر کا سہارا لیتے ہیں لیکن کیا آپ جانتے ہیں کہ بار بار بال رنگنا کتنا مناسب ہے اور ہیئر کلر خریدتے وقت کن باتوں کا خیال رکھنا ضروری ہے؟ کم عمری میں بال سفید کیوں ہوتے ہیں؟ ماہرین کے مطابق وقت سے پہلے بال سفید ہونے کی سب سے بڑی وجہ عموماً جینیٹکس ہوتے ہیں۔ اس کے علاوہ وٹامن بی 12 اور بعض دیگر غذائی اجزا کی کمی، صحت کے کچھ مسائل اور طرزِ زندگی سے متعلق عوامل بھی بالوں کے قبل از وقت سفید ہونے میں کردار ادا کر سکتے ہیں۔ ہیئر کلر میں کون سے اجزا دیکھنے چاہئیں؟ ہیئر کلر خریدتے وقت صرف خوبصورت شیڈ یا قیمت پر توجہ نہ دیں بلکہ پیکنگ پر درج اجزا بھی ضرور پڑھیں۔ امونیا (Ammonia): بعض مستقل ہیئر کلرز میں استعمال ہوتا ہے اور رنگ کو بالوں کے اندر پہنچانے میں مدد دیتا ہے۔ کچھ افراد کو اس سے جلن یا تکلیف ہو سکتی ہے۔ پی پی ڈی (PPD): گہرے اور دیرپا رنگوں میں استعمال ہونے والا ایک کیمیائی جز ہے، جو بعض افراد میں الرجی پیدا کر سکتا ہے۔ خوشبو اور دیگر اجزا: حساس جلد والے افراد میں بعض خوشبودار یا دیگر کیمیائی اجزا بھی ردعمل پیدا کر سکتے ہیں۔ امونیا فری ہیئر کلر: عموما اگر پیکجنگ میں 'امونیا فری' یا 'پی پی ڈی فری' لکھا ہو تو وہ حساس جلد والے لوگوں کیلئے مناسب ہوتے ہیں۔ کتنے دن بعد بالوں کو دوبارہ رنگنا چاہیے؟ اس سوال کا کوئی ایک جواب نہیں کیونکہ ہر شخص کے بالوں کی ساخت، بڑھنے کی رفتار اور سفید بالوں کی تعداد مختلف ہوتی ہے۔ اگر چند ہی بال سفید ہیں تو انہیں کبھی کبھار رنگنا کافی ہو سکتا ہے لیکن اگر کنپٹیوں، پیشانی یا مانگ کے قریب سفید بال زیادہ ہوں تو چند ہفتوں بعد جڑوں سے نئے سفید بال نمایاں ہونے لگتے ہیں۔ مستقل ہیئر کلر استعمال کرنے والے افراد عموماً 4 سے 6 ہفتوں بعد جڑوں کو دوبارہ رنگتے ہیں تاہم یہ وقفہ ضرورت اور پراڈکٹ کی ہدایات کے مطابق مختلف ہو سکتا ہے۔ اگر بالوں کے درمیانی اور آخری حصوں کا رنگ برقرار ہے تو صرف جڑوں کو رنگنا کافی ہو سکتا ہے۔ بار بار پورے بالوں پر کیمیائی رنگ لگانے سے خشکی اور بالوں کو نقصان پہنچنے کا امکان بڑھ سکتا ہے، اس لیے غیر ضروری استعمال سے گریز کرنا بہتر ہے۔ رنگتے وقت یہ احتیاط ضرور کریں: اپنی ضرورت کے مطابق مستقل یا عارضی ہیئر کلر منتخب کریں۔ صرف سفید جڑیں نمایاں ہونے پر پورے بالوں کو دوبارہ رنگنے سے گریز کریں۔ رنگ کو مقررہ وقت سے زیادہ دیر تک بالوں پر نہ چھوڑیں۔ بالوں کی خشکی کم کرنے کے لیے مناسب کنڈیشنر استعمال کریں۔ اگر رنگ لگانے سے شدید خارش، جلن یا سوجن ہو تو فوراً استعمال بند کر دیں۔